Hoxe comeza a Feira de Ciencia de Ribadeo

Esta entrada participa na edición LI (abril de 2014) do Antroido da física/Carnaval de la Física, co blog anfitrión ::ZTFNews:
Hoxe mércores e mañá xoves, en horario de 9:20 a 13:10, terá lugar a XX Feira da Ciencia de Ribadeo, no IES de Ribadeo Dionisio Gamallo. Nela participarán 26 traballos realizados por unha centea de alumnos e alumnas do centro, que serán expostos e explicados polos mesmos alumnos que os realizaron.
A feira representa o remate dos traballos sobre diversos aspectos científicos, aínda que con posterioridade de moitos deles farase unha memoria detallada sobre a súa realización.
A maioría de presentacións son expostas por primeira vez, aínda que algunha xa foi exposta noutros foros con anterioridade. Asemade, algunha foi realizada a partir da colaboración con outros centros educativos. Unha volta rematada a feira, terán a oportunidade dun recorrido por outros foros fóra de Ribadeo, como o día da ciencia na rúa de A Coruña ou a Galiciencia de Ourense. As citadas son visitas xa tradicionais para os alumnos ribadenses, que levan achegándose á Coruña no mes de maio case dous decenios, e máis dun quinquenio a Ourense en novembro, presentando sempre traballos que foron expostos na feira de Ribadeo.
O cartel está confeccionado a partir da placa que indica a posición de Ribadeo, situada á entrada da Casa do Concello con datos do IGN, á que se lle engadiu a modo de lema desta edición 'revelando as cousas'.
O folleto informativo:

Revelando as cousas

 

Traballos presentados

1ESOA1. Videoxogos en Ribadeo

1ESOA2. Dixestión dos hidratos de carbono

1ESOA3. Volcán

1ESOA4. Papel reciclado

1ESOA5. Holograma sinxelo e ilusións ópticas

1ESOA6. Burbullas eléctricas

1ESOB1. Propiedades da auga

1ESOB2. Clasificación de invertebrados

1ESOB3. Solubilidade de gases

1ESOB4. Conservación da carne

1ESOC1. Sismógrafo

1ESOC2. Compás caseiro

1ESOC3. Caixa escura

1ESOC4. Refracción da luz

1ESOC_a. Estudo da produción de electricidade a partir de vexetais

2ºESOB. Viaxe ocular

1bacA1. Variación do bote dun balón en función da cantidade de aire

1bacA2. Experiencias: Reloxo de I e quimioluminiscencia

1bacA3. Extracción de ADN de distintos vexetais

1bacA4. A maxia luminosa

1bacA5. Compoñentes do leite

1bacA6. As cores do lume

1bacA7. Magnetismo da candea

1bacA8. Experiencias con augaforte e papel de Al

1bacA9. Medición do radio terrestre

1bacB. A caixa negra dos peixes

(os subraiados estará no laboratorio)

Conflito horario. Tempo e astronomía

Esta entrada participa na edición LI (abril de 2014) do Antroido da física/Carnaval de la Física, co blog anfitrión ::ZTFNews:

A imaxe anterior lévoa vista varias veces estes días polas redes sociais. Trataría de ser a visualización do por que España (ou Galicia, segundo a versión) debera cambiar de hora legal, achegándoa á británica e separándoa da alemana, adoitada polo réxime fascista con bases ideolóxicas, ó que parece.
Para comparar, deixo embaixo un mapa de fusos horarios a nivel mundial collido da Galipedia:

Neste segundo, constátase que certamente, España ten o mesmo horario solar que Inglaterra, aproximadamente, e Galicia, que Irlanda ou por suposto Portugal, lonxe abondo da hora de Centroeuropa que temos como horario legal. O segundo, pois, chega para abogar por un cambio de horario legal. E o primeiro, por contra, é unha engañifa.
No equinoccio, polo segundo mapa, podemos ver que en Cataluña anoitece á mesma hora que na costa leste do Reino Unido, nunha situación que cortaría a Francia pola metade no lusco fusco. O resto de Europa estaría xa metida na noite. E esa é a situación media ó longo do ano, e polo tanto, a representativa.
Mais a situación que presenta a imaxe de satélite non é tal. Vemos que está anoitecendo en Cataluña ó tempo que no Benelux e na separación fronteiriza Noruega-Suecia. É dicir, está representando unha situación pŕoxima á do solsticio de verán, que ilumina o hemisferio norte máis tempo da media. E iso introduce un elemento que perturba o razaoamento, é unha imaxe tendenciosa: fai crer a quen non se decate que a situación normal é que en Cataluña anoiteza ó tempo que nos países nórdicos, quizáis procurando afinidade horaria (solar) coa maior cantiade de países posible.
Ou sexa, que se alguén non aplica algún coñecemento de astronomía, enganarase de xeito doado nun tema como o do horario, e será manipulado do mesmo doado xeito.
Así pois, cambio horario, si, pero sendo xustos.